Ein rôl

Rydym yn cynnal gwrandawiadau sy’n gwneud penderfyniadau annibynnol ynghylch a yw meddygon, cymdeithion meddygol (PAs) a chymdeithion anesthesia (AAs) yn addas i ymarfer yn y DU.

Gall ein tribiwnlysoedd gyfyngu ar ymarfer meddyg, cydymaith meddygol neu gydymaith anesthesia, neu eu hatal rhag gweithio yn y DU.

Beth ydym yn ei wneud?

Rydym yn cynnal gwrandawiadau tribiwnlys ymarferwyr meddygol a gwrandawiadau tribiwnlys gorchmynion interim ar gyfer meddygon; a thribiwnlysoedd cyswllt a thribiwnlysoedd gorchmynion interim ar gyfer cymdeithion meddygol a chymdeithion anesthesia.

I wneud hyn, rydym yn:

• gwneud yn siŵr bod penderfyniadau’r tribiwnlys yn bodloni ein safonau uchel
• penodi, arfarnu a hyfforddi:
  1. aelodau'r tribiwnlys
  2. cadeiryddion ac aseswyr cyfreithiol sydd â chymwysterau cyfreithiol
  3. rheolwyr achos
• trefnu gwrandawiadau
• hwyluso cyfarfodydd cyn y gwrandawiad
• rhoi cymorth gweinyddol i dribiwnlysoedd yn ystod gwrandawiadau
• diweddaru cofrestrau’r GMC a chyhoeddi cofnodion gwrandawiadau cyhoeddus
• darparu gwybodaeth am wrandawiadau sydd ar y gweill

Ein gwrandawiadau

Fel arfer, rydym yn cynnal sawl gwrandawiad bob dydd, ac mae’r rhan fwyaf ohonynt yn agored i’r cyhoedd. Gall y rhain ddigwydd naill ai wyneb yn wyneb neu ar-lein.

Rydym yn cynnal gwrandawiadau yn unol â Deddf Feddygol 1983, Gorchymyn Cymdeithion Anesthesia a Chymdeithion Meddygol 2024, a rheolau statudol eraill.

Darganfyddwch fwy am sut mae gwrandawiadau'n gweithio i feddygon, ac i gymdeithion meddygol a chymdeithion anesthesia.  

Ein perthynas â’r GMC

Rydym yn atebol i Gyngor y GMC a Senedd y DU, ac yn gweithredu ar wahân i’r GMC.