Yn y gwrandawiad
Ble y caiff gwrandawiadau eu cynnal?
Caiff gwrandawiadau eu cynnal naill ai yn ein canolfan gwrandawiadau neu ar-lein dros Microsoft Teams.
Mae ein canolfan wrandawiadau ar y 7fed llawr yn Adeiladau St James yn Oxford Street, Manceinion.
Os gofynnwyd i chi roi tystiolaeth yn rhithiol, gweler ein canllawiau ar gyfer tystion mewn gwrandawiadau rhithiol.
Pan fyddwch yn cyrraedd
Ceisiwch gyrraedd o leiaf hanner awr cyn y disgwylir i chi roi tystiolaeth.
Dylech ddod i’n derbynfa ar y 7fed llawr, lle byddwn yn gofyn i chi fewngofnodi. Byddwn hefyd yn rhoi pas ymwelydd i chi. Wedyn, byddwn yn eich tywys i fan aros.
Os ydych chi’n poeni am gwrdd ag unrhyw un sy’n ymwneud â’r achos pan fyddwch chi’n cyrraedd, mae’n bosibl y bydd modd i rywun gwrdd â chi a’ch tywys i ystafell aros breifat. Dylech roi gwybod i ni cyn gynted â phosibl os oes gennych unrhyw bryderon o’r fath.
Yn anffodus, allwn ni ddim bod yn sicr na fyddwch yn cwrdd â phobl eraill sy’n gysylltiedig â’r achos.
Os yw’r Cyngor Meddygol Cyffredinol wedi gofyn i chi roi tystiolaeth, bydd aelod o’u tîm cyfreithiol yn dod i gyflwyno eu hunain ar ôl i chi gael eich tywys i’r man aros.
Os meddyg, cydymaith meddygol neu gydymaith anesthesia sydd wedi gofyn i chi roi tystiolaeth, byddwn yn rhoi gwybod iddyn nhw neu eu cynrychiolwyr ar ôl i chi gyrraedd.
Aros i roi tystiolaeth
Gallwch aros yn un o’n hystafelloedd aros nes bydd y tribiwnlys yn galw arnoch i roi tystiolaeth. Allwch chi ddim mynd i'r gwrandawiad cyn hynny.
Mae gennym fannau aros cyhoeddus, a mannau aros ar gyfer tystion yn unig. Gallwch aros lle rydych chi’n teimlo’n fwyaf cyfforddus. Ond, gwnewch yn siŵr bod aelod o staff yn gwybod ble rydych chi.
Tra byddwch chi’n aros, peidiwch â thrafod yr achos na’ch tystiolaeth gyda neb. Gallai hyn effeithio ar ganlyniad y gwrandawiad.
Rydym yn ceisio delio ag achosion cyn gynted â phosibl. Ond weithiau gall gwrandawiadau redeg yn rhy hir, felly mae’n bosibl y bydd yn rhaid i chi aros rywfaint o amser cyn i chi roi tystiolaeth. Bydd aelod o staff yn rhoi’r wybodaeth ddiweddaraf i chi am amseriad yr achos, lle bo hynny’n bosibl.
Os na allwch roi tystiolaeth ar y diwrnod penodedig oherwydd oedi neu newid mewn amgylchiadau, bydd gofyn i chi ddychwelyd ar ddiwrnod arall.
Cwestiynau am y gwrandawiad
Os oes gennych chi gwestiynau am y gwrandawiad, siaradwch ag aelod o’n staff neu’r cynrychiolydd cyfreithiol ar gyfer y parti sydd wedi galw arnoch.
Cyfleusterau sydd ar gael i chi
Lluniaeth
Mae te, coffi a dŵr ar gael ym mhob man aros. Mae peiriant gwerthu bwyd a diod yn y man aros cyhoeddus ar y 7fed llawr..
Ystafell dawel
Mae ein hystafell dawel yn lle croesawgar a hygyrch i unrhyw un ei defnyddio. Gellir ei defnyddio ar gyfer amrywiaeth o weithgareddau preifat, fel gweddïo neu fwydo ar y fron. Mae’n cynnwys cyfleusterau ymolchi hefyd, ac mae croeso i chi eu defnyddio i ymolchi er mwyn paratoi i weddïo.
Amwynderau lleol
Mae sawl caffi, bwyty a siop o fewn ychydig o funudau i’n canolfan wrandawiadau. Rhowch wybod i’r cynrychiolydd cyfreithiol priodol neu aelod o staff os byddwch yn gadael y ganolfan wrandawiadau. Efallai yr hoffech adael rhif ffôn, rhag ofn y bydd angen i ni gael gafael arnoch chi os ydych chi wedi gadael yr adeilad.