Pwy fydd yn y gwrandawiad?

Pwy sy’n gysylltiedig, a beth maen nhw’n ei wneud?

Defnyddir teitlau ffurfiol wrth gyfeirio at bobl sy’n cymryd rhan mewn gwrandawiadau. Rydym yn egluro pwy yw’r bobl hyn a beth maen nhw’n ei wneud isod.

Tribiwnlys yr MPTS

Bydd pob tribiwnlys yn cynnwys tri unigolyn.

Bydd o leiaf un wedi cofrestru â’r GMC gyda thrwydded i ymarfer a bydd o leiaf un person lleyg (heb gofrestru â’r GMC). Bydd un aelod o’r tribiwnlys yn gweithredu fel cadeirydd, ac fel arfer mae ganddo gymwysterau cyfreithiol. Bydd y cadeirydd yn sicrhau bod y gwrandawiad yn cael ei gynnal yn deg. Hefyd, mae ganddynt ddyletswydd i ddiogelu buddiannau pawb sy’n gysylltiedig â’r achos, gan gynnwys tystion.

Cadeirydd cyfreithiol gymwys

Mae gan y rhan fwyaf o wrandawiadau gadeirydd sydd â chymwysterau cyfreithiol, ac mae’n eistedd fel rhan o’r tribiwnlys ac yn cynghori ar bwyntiau cyfreithiol. Mae’n gyfrifol am gynnal y gwrandawiad.

Asesydd cyfreithiol

Bydd gan rai gwrandawiadau asesydd cyfreithiol, yn hytrach na chadeirydd sydd â chymwysterau cyfreithiol. Maent yn darparu cyngor cyfreithiol i’r tribiwnlys, ond nid ydynt yn cymryd rhan yn y broses o wneud penderfyniadau.

Cynrychiolydd y Cyngor Meddygol Cyffredinol (GMC)

Y bargyfreithiwr neu’r cyfreithiwr sy’n cyflwyno’r achos yn erbyn y meddyg, y cydymaith meddygol neu’r cydymaith anesthesia ar ran y GMC. Gellir cyfeirio atynt hefyd fel ‘Cwnsler ar gyfer y GMC’. Mae’n bosibl y bydd cynrychiolydd y Cyngor Meddygol Cyffredinol yn gofyn cwestiynau i chi am eich tystiolaeth.

Cynrychiolydd yr unigolyn cofrestredig 

Yr unigolyn sy’n cyflwyno’r achos neu’n siarad ar ran y meddyg, y cydymaith meddygol neu’r cydymaith anesthesia.

Efallai y cyfeirir atynt hefyd fel ‘Cwnsler i’r meddyg’ neu ‘Gwnsler i’r cydymaith’. Bydd yn cyflwyno safbwynt yr unigolyn cofrestredig i’r tribiwnlys ac mae’n bosib y bydd yn gofyn cwestiynau i chi am eich tystiolaeth.

Meddyg, cydymaith meddygol neu gydymaith anaesthesia

Yr unigolyn y gwnaed honiadau yn ei erbyn. Efallai y cyfeirir ato fel yr unigolyn cofrestredig yn ystod y gwrandawiad. 

Clerc y tribiwnlys

Aelod o staff Gwasanaeth Tribiwnlys Ymarferwyr Meddygol, sy’n gyfrifol am weinyddu’r gwrandawiad. Mae clercod tribiwnlys yn helpu tribiwnlysoedd i ddrafftio eu penderfyniadau, ond nid ydynt yn cymryd rhan yn y broses o wneud penderfyniadau.

Cynorthwyydd tribiwnlys

Aelod o staff Gwasanaeth Tribiwnlys Ymarferwyr Meddygol, sy’n helpu’r clerc i weinyddu’r gwrandawiad. Dyma’r person fydd yn eich cyfarch pan fyddwch chi’n cyrraedd os ydych chi’n rhoi tystiolaeth wyneb yn wyneb yn yr ystafell, neu’n eich gadael i mewn i’r gwrandawiad os ydych chi’n rhoi tystiolaeth yn rhithiol. Mae’n bosib na fydd cynorthwyydd tribiwnlys penodol ar gael ym mhob achos.

Y cyhoedd neu’r wasg

Mae’r rhan fwyaf o wrandawiadau’n gyhoeddus. Yn ein canolfan gwrandawiadau, mae orielau cyhoeddus ym mhob ystafell lle cynhelir gwrandawiad a gall aelodau o’r cyhoedd neu’r wasg arsylwi neu adrodd ar yr hyn sy’n cael ei ddweud.

Mewn gwrandawiadau rhithiol, gall aelodau o’r cyhoedd a’r wasg arsylwi’n rhithiol ar yr amod eu bod wedi cwblhau eu gwiriadau diogelwch.

Mae’n bosibl y bydd adegau pan fydd angen i achos fynd i sesiwn breifat am gyfnod. Os bydd hyn yn digwydd, gofynnir i’r wasg a’r cyhoedd adael.